அன்னபூரணியிடம் மோனலிசா புன்னகை!

மாமன்னன் இரண்டாம் ராஜராஜ சோழனால் சுமார் 800 ஆண்டுகளுக்கு முன்னர் கட்டப்பட்ட பழமை வாய்ந்தது கும்பகோணம் அருகில் உள்ள தாராசுரம் ஐராவதீஸ்வரர் ஆலயம். தஞ்சாவூருக்கு முன் சோழர்களின் தலைநகரமாக திகழ்ந்த பழையாறையின் ஒரு பகுதியில்தான் இக்கோயில் கட்டப்பட்டுள்ளது.

நூறு கோயில்களுக்குச் சென்று அதன் சிற்பங்களின் பேரழகைப் பார்த்து ரசித்த அனுபவத்தை, இந்த ஒரே கோயிலுக்குள் கொண்டு வந்து பிரமிக்க வைத்திருக்கிறார்கள் சோழர்கால சிற்பிகள். பல்லாயிரக்கணக்கான சிற்பங்களை செதுக்கி வைத்திருக்கிறார்கள். முப்புரம் எரித்த திரிபுராந்தகன் கதையை நம் கண் முன் நிறுத்துகிறது ஒரு சிற்பம். கஜமுக அசுரனை வதம் செய்யும் ஈஸ்வரனை கஜசம்ஹார மூர்த்தி எனும் இச்சிற்பம் அற்புதமான வடிவில் அமைக்கப்பட்டுள்ளது. யானையின் மத்தகத்தில் ஒரு காலை வைத்து நிற்கும் இந்த ஈஸ்வரன் சூலத்தை தலைகீழாக வைத்து யானையை வதம் செய்கிறார். உரிக்கப்பட்ட தோல்களே இச்சிற்பத்திற்கு திருவாட்சியாக அமைகிறது. ஈஸ்வரனின் உக்கிரமான பார்வையைப் பார்த்து பயந்த கோலத்தில் ஒடுங்கி நிற்கிறாள் பார்வதி. யானையின் கால்கள் கீழே இரண்டும், மேலே இரண்டுமாக தொங்குகின்றன. கஜசம்காரமூர்த்தி எனும் இச்சிலையை கரி உரித்த சிவன் என்று தேவார பாடல்களில் குறிப்பிடப்பட்டுள்ளது. உருவங்களை அழகிய முறையில் வடிவமைக்கப்பட்ட சிறந்த கட்டமைப்பு சிற்பமாக சிற்பிகளால் கருதப்படுகிறது. தாராசுரக்கோயிலில் எங்கோ ஒரு மூலையில் தரையில் கிடந்த இச்சிற்பத்தை தற்போது தஞ்சை அருங்காட்சியகத்தில் பாதுகாத்து வருகின்றனர்.

இதுபோல் இறைவனின் அடி முடி தேட வைக்கும் லிங்கோத்பவர் சிற்பம் போன்றவை நம்மை ஆச்சரியப்படுத்துகின்றன. ரத மண்டபத் தூண்களில் மகாபாரதம், ராமாயணம் மற்றும் சிவபுராணம், பரத நாட்டிய கர்ணங்கள், ரதி மன்மதன் கதைகள் என்று எண்ணிலடங்கா கதைகளைச் சொல்கின்றன இச்சிற்பங்கள். தூண்களின் நான்கு பட்டைகளிலும் சிற்றோவியங்கள்போல் ஆயிரக்கணக் கான புடைப்புச் சிற்பங்கள் உள்ளன.

கோயிலின் நுழைவாயினுள் செல்வதற்கு முன்பே பலிபீடத்திற்கு ஏறும் ஏழு கருங்கற்படிகளை, சரிகமபதநி எனும் ஏழு சுர படிகளாக வடிவமைத் துள்ளது அனைவரையும் கவர்ந்திழுக்கிறது. கீழ்வாயிலுள் நுழைந்தால் கம்பீரமாக உயர்ந்து நிற்கும் கொடிமரம். கோயிலின் கூம்பிய விமானத் தோற்றம், அதற்குக் கீழ் உள்ள மண்டபமும், இரு புறமும் யானைகளும், குதிரைகளும் பூட்டிய ரதம்போல் அமைக்கப்பட்ட இக்கோயிலை சிற்பக்கலையின் சிகரம் என்றே சொல்லலாம்.

இங்குள்ள அன்னபூரணி, கண்ணப்ப நாயனார் சிற்பங்கள் வெளிநாட்டு பயணிகளை வியப்பூட்டும் சிற்பங்களாகும். முன்மண்டபத்தைத் தாண்டி முகவாயில் தோன்றும் அன்னபூரணி சிற்பம் வெளிநாட்டு பயணிகளை அதிலும் குறிப்பாக பிரான்சு நாட்டு பயணிகளை கவர்ந்து இழுக்கும் சிற்பமாகும். புன் முறுவல் சிறப்போடு திகழும் இச் சிற்பம், தற்போது பிரான்ஸ் நாட்டின் அருங்காட்சியகத்தில் உள்ள லியனார்டோ டாவின்சியால் வரையப்பட்ட மோனலிசா எனும் ஓவியத்தில் தோன்றும் புன்னகைக்கு இணை யானது என்கின்றனர்.

சிவத்தொண்டர்களான அதிபத்தர், அமர்நீதியார், இயற்பகையார், இசை ஞானியார், ஏனாதி நாயனார் கண்ணப்பர், கழற்சிங்கர் போன்ற 63 நாயன்மார்களின் புடைப்புச் சிற்பங் களை, கோயிலைச் சுற்றி ஒரு முறை வலம் வந்தால் அனைத்தையும் பார்த்துவிடலாம். இதுபோல் 63 நாயன்மார்களின் புடைப்பு கற்சிற்பங்கள் வேறு எந்தக் கோயிலிலும் இல்லாத சிறப்புடையதாகும்.

பிரான்ஸ், அமெரிக்கா, இங்கிலாந்து போன்ற நாடுகளிலிருந்து பயணிகள் ஆண்டிற்கு ஒரு லட்சத்திற்கு மேல் இங்கு வந்த வண்ணம் உள்ளனர்.

கல்வெட்டுகள், நாட்டிய கர்ண முத்திரைகள், ராமாயண மகாபாரத காவியங்கள் மற்றும் சிவபுராணக் கதைகள் போன்ற 10 ஆயிரத்துக்கு மேற்பட்ட கொத்துக்கொத்தான சிற்பங்கள் கொண்ட பெருமைமிகு இவ்வாலயத்தை சிற்பங்களின் கலைக்கூடம் எனலாம்.

Thanks
dinamani.com